Информација до здружението на пчелари!

Се известуваат граѓаните кои одгледуваат пчели на подрачјето на општина Вевчани дека на ден 10.07.2020 година (петок), екипите на Центарот за јавно здравје Охрид, ќе спроведат теристичка (од земја) дезинсекција за уништување на комарците. Запрашувањето ќе се врши во периодот од 19:00 до 04:00 часот.

Вицепремиерката – Радмила Шекеринска во посета на општина Вевчани

Денес, во посета на Вевчани беше Министерката за одбрана и Вицепремиерка – Радмила Шекеринска.

Во склоп на оваа работна посета градоначалникот Сашо Јанкоски и вицепремиерката Радмила Шекеринска, извршија  увид во изградените објекти, како и проектите кои се во завршна фаза од изградбата.
Вицепремиерката беше воодушевена од преубавата природа како и од новата планинарска куќа финансирата од ГИЗ и реализирана од планинарското друштво “Церн Камен 2257” – Вевчани преку проектот “Реконструкција и опремување на планинарската куќа во модерен планинарски дом”- Јанков Камен. Овој планинарски дом ќе можат да го користат сите љубители на природата.

Во рамките на посетата беше извршена и еколошка акција со помош на младината.

Со градоначалникот Сашо Јанкоски ја посетија и пречистителната станица за отпадни води во Вевчани, која е во завршна фаза и со која инвестиција го решаваме долгогодишниот проблем со загадување на огромната земјоделска површина во овој регион. Реализацијата на проектот ќе придонесе кон подобрување на имиџот на општина Вевчани како еколошки чиста дестинација, а ќе претставува и позитивен пример за рурална општина која во целост го решила проблемот со изградба на канализационен систем, третман и прочистување на отпадните води. Проектот се спроведува преку УНДП и е финансиран преку ЕУ. Неговата вредност е околу 17 милиони денари.

Извршија увид и на градежните активности на Обиколницата на регионалниот пат Југ-Вевчани чија изградба е во тек и се очекува да заврши многу брзо. Вицепремиерката истакна дека како централна власт се насочени кон решавање на инфраструктурните проблеми на населението. Со изградбата на овој крак на регионален пат ќе се разреши долгогодишниот проблем на поврзаност со Здравствениот дом на жителите од Вевчани, Велешта и Лабуништа. Досега приодот до здравствениот објект се одвиваше по заобиколен и многу подолг пат со што беше отежнато давањето на здравствени услуги.

Вицепремиерката Мила Царовска во работна посета на општина Вевчани

Градоначалникот на општина Вевчани Сашо Јанкоски заедно со Мила Царовска – Заменичка на Претседателот на Владата задолжена за економски прашања, Кирил Колемишевски – Заменик министер за економија, Дејан Павлески – Заменик министер за локална самоуправа беа на увид на мултифункционалниот туристички објект “Туристички центар Вевчани”

Потпроектот „Туристички центар Вевчани – Еден центар еден туристички производ“ е финансиран од Европската унија и Владата на Република Северна Македонија. Овој проект е имплементиран од Кабинетот на Заменик Претседателот на Владата задолжен за економски прашања, а администриран од Светска банка преку единицата за спроведување на Проектот за Локална и Регионална Конкурентност.

Вкупната корисна површина на овој модерен мултифункционален центар е 1400м2, во кој се вклучени конгресна сала, сала за семинари, галерии, музејска поставка, фитнес и бодибилдинг сала и др. Во овој проект се финансирани 985.000 евра.

Проектот започнат пред повеќе од една деценија конечно ќе го види светлото на денот, сонот на вевчанци ќе биде конечно остварен. Во моментов објектот е во фаза на внатрешно опремување и за кратко време истиот ќе биде ставен во функција. Исто така паралелно се работи и на партерно уредување на просторот, со што туристичкиот центар ќе добие нов и модерен изглед.

Овој објект значително ќе допринесе за зголемување на туристичката понуда не само на Вевчани туку и на целиот регион.

Истовремено, Заменик министерот за локална самоуправа Дејан Павлески го посети и новоизградениот парк пред општинската зграда. Проектот „Изградба и партерно уредување на мал плоштад СА во центарот на Вевчани“ е финансиран преку Биро за регионален развој.

Реконструкција на канализациона линија „Сербакој – Бубаној“

Преку Бирото за рамномерен регионален развој обезбедивме средства во висина од 1.500.000,00 денари за нова канализациона линија.

После 40 години ќе се гради нова, односно ќе се реконструира канализациона линија Сербакој – Бубаној како дел од канализационата линија Трафо – Бубаној – Смолејца.
Оваа реконструкција е предуслов за реконструирање и на асфалтниот слој на истоимената улица, бидејќи ние градиме по план.

Полуматурантите од ООУ „Страшо Пинџур“ Вевчани – Генерација 2020 на прием кај градоначалникот

Денес во просториите на општина Вевчани, градоначалникот Сашо Јанкоски изврши прием на полуматурантите, со цел одбележување на овој значаен момент за нив, кој го одбележа со мал симболичен поклон за нив. Градоначалникот им ја честита полуматурата во согласност со препорачаните мерки и услови кои ги наметна новонастанатана состојба со вирусот Ковид19:

Драги полуматуранти,

Од името на Општина Вевчани како и од мое лично име,
Ви посакувам успешно завршување на вашето основно образование, кое е само едно скалило во понатамошното ваше образование. 

Ви посакувам голем успех во понатамошното ваше школување и запишување во средно училиште. 🧑🏻‍🎓

Ситуацијата која не снајде, ви ја расипа вечерашната заедничка полуматурантска забава. Но тоа, треба да ве охрабри да ги почитувате мерките и препораките, за во текот на летото, кога ќе го победиме вирусот да прославите како што доликува.

Да ми сте живи и здрави