Вчера, во Мултикултурниот центар „ Коста Србакоски “ во рамките на програмата на Вевчанско лето 2022 во Вевчани се прославија 35 години од „Вевчанскиот случај “ под мотото „ Никваш да не се повторит ама и да не се заборајт“ во организација на Вевчани турист Инфо а под покровителство на Општина Вевчани.

Манифестацијата започна од 19 часот кога беше отворена изложба на уметнички дела на вевчанските уметници : Никола Угриноски, Аница Китаноска, Д-р Марјана Костојчиноска Узунчева, Симун Лешоски, Симун Коруноски, Перо Шутиноски и Коста Костоски која ќе биде отворена за посетители секој ден од 18:00 до 20:30 часот.

Официјалниот дел започна во 20: 30 часот. Во рамки на програмата беа емитувани автентични аудио снимки од новинарот во пензија од Радио Београд Драгослав Симиќ, кој овој случај со следеше од почетокот па се до самиот крај.

Симиќ престојуваше во Вевчани, присуствуваше на протестите во Скопје и на сите случувања кои следеа и направи фотографии и аудио записи кои сведочат за Вевчанскиот дух и непокор.